KUCHING: Sapit Premier Sarawak, Datuk Amar Profesor Dr Sim Kui Hian ngansak raban kunteriktor ngerumban kereja bekaul projek Jematan Kedua Batu Kawa enggau jalai tama baru beungkus RM160 juta.

Ku iya, pengawa udah tu mutarka pekara ngambi tanah enggau tinda projek laban kereja nyukat tanah udah tembu.

Berindik ari nya, iya muji penyikar Opis Tanah enggau Survey (JTS) nembuka pengawa ke patut ba projek nya.

“Ketegal peneras pemansang di Batu Kawa, penyampau tubuh peranak enggau pejalai trafik nyata endar nambah lalu ngasuh jalai sekut sepemanjai Jalai Batu Kawa enggau Jematan Datuk Chong Kiun Kong.

“Projek pemansang besai enggau beguna tu deka bekenaka belanja RM160 juta, mungkur pengawa ngaga Jematan Batu Kawa Kedua meraka Sungai Sarawak.

“Udah nya, projek ngaga jalai dua arung baru enggau semua pemanjai ngelui 5 kilometer.

“Kededua projek tu deka mantu ngurangka penanggul jalai sekut ke nyadi diatu,” ku iya ba sebengkah penerang ensanus.

Dr Sim madah baru, kenyau ari iya dipilih nyadi Kaban Kunsil Nengeri (ADUN) Batu Kawa taun 2016, iya endang meri perati ngagai penanggul jalai sekut enggau ngaga jalai baru dikena ngemesaika pejalai trafik.

Nya alai ku iya, mayuh jalai tama baru udah tembu digaga beberapa taun ke udah nyengkaum Jalai Tan Sri Wee Boon Ping ti nyambung Jalai Stephen Yong nyentuk Batu 4 dan Batu 1/2.

“Pia mega, jalai tama baru ari Kampung Segedup ke Jalai Sungai Maong enggau Matang sereta jalai tama alternatif Taman Kwang Tiong. Semua jalai baru tu udah nyaup ngurangka jalai sekut.

“Kelimpah ari nya, jalai tama baru ke Jalai Ensing Timur ari Jalai Datuk Tan Men Chong/Jalai Stapok Utama Junction, Batu Kawa benung digaga,” ku iya.

Iya nyemetak amdah, jalai penyambung sepanjai 3 kilometer ari lampu trafik Jalai Stephen Yong nengah Kampung Segedup ke Matang ti mega deka digaga enda lama da.

“Semua ungkup projek ngaga jalai baru tu udah dipelanja Perintah Sarawak tang semua chukai jalai diambi Perintah Besai.

“Nya alai, aku ngansak semua Kaban Parlimen Sarawak nagih mayuh agi projek pemansang jalai alun dipelanja Perintah Besai dikena mutarka penanggul trafik sekut di selampur Sarawak,” ku iya mantangka jaku. – EDISI UKAS