Uggah begulai enggau temuai dipebasa ti bukai begambar bebala mayuh enggau penerima pampas ba pengerami diatur di Spaoh, Betong, kemari.

KUCHING: Pemansang Agropark Bebuling sereta Palan Ngumpul, Proses enggau Mungkus nyadi chara baru perintah ngelatih enggau meri kelala konsep betanam betupi moden ngagai peranak lokal.

Sapit Premier Sarawak, Datuk Amar Douglas Uggah Embas madahka, nya sebagi ari pemansang ti dilanggur perintah ba kandang endur nya nyengkaum ba Bukit Saban enggau pasar Spaoh.

"Ba agropark tu kitai nguna urung 60 hektar tanah alai ngaga rumah gadung. Kami meransang tauka ngelaluka sida ti kala ngempu tanah nya ngambi bagi ba program din.

"Kitai mega bisi Lapangan Terbang Landasan Pendek (STOLport) Bebuling ti tembu Ogos taun baru deka nyadi pintu tama alai nyual produk kitai enggau lengkas," terang iya.

Iya madahka pekara nya pengudah nyuaka bayar pampas tanah sepenyampau RM8.591 juta ngagai 201 penerima iya nya tanah sida diambi alai bejalaika empat projek besai ba sitak Bukit Saban di Spaoh, Betong, kemari.

Pampas pemadu mayuh dibayar sepenyampau RM7,345,322 ngagai 126 pengempu tanah ti tekeruga alai pemansang Agropark Bebuling sereta Palan Ngumpul, Proses enggau Mungkus.

Uggah ti mega Kaban Kunsil Nengeri (ADUN) Bukit Saban madah, objektif perintah Gabungan Parti Sarawak (GPS) ngambi ke peranak menua pesisir ti kurang penatai pemisi nambahka penatai pemisi nengah betanam betupi moden.

"Sarawak diaku nyadi wilayah bepenatai pemisi tinggi tang kitai deka ke rayat lebih agi sida ti kurang penatai pemisi nambahka penatai pemisi sida," ku iya.

Kelimpah ari agropark nya ku iya, Spaoh, Kabong enggau Beladin sama deka bulih palan hemodialisis.

Nitih ke iya, Opis Menteri Pengerai (KKM) udah ngemendarka pengawa numbuhka palan hemodialisis nya sereta Agensi Pemansang Bagi Menua Betong deka melanja projek nya ngena ungkus RM5 juta ke tiap projek nya.

Iya arap bendar penemu palan nya ila deka ngurangka pemayuh nganti berubat ba Sepital Betong tauka Sri Aman.

"Opis menteri mega udah ngemendarka pengawa ngaga klinik pengerai baru enggau moden di Spaoh kena nganti klinik lama ke endang udah bisi.

"Kami udah nemu dini alai taba projek nya ti mega sama alai palan hemodialisis.

"Bekaul enggau ungkus belanja dikena, ia agi ditentuka. Kami ngarapka ulih berengkah digaga enda lama agi," ku iya.

Ngenang pekara bukai, Uggah madah, Lembaga Kemajuan Tanah Sarawak deka ngaga kilang padi ba kandang endur nanam padi Tanjung Sebekut.

Kandang endur nya ku iya, udah ditemu nyadi siti ari tibang padi nengeri.

Sama bisi datai ba pengerami nya, Tuai Opis Tanah enggau Survei Betong Moris Nayup enggau Manijar Besai Lembaga Kemajuan Tanah Sarawak, Dr Harry Entebang.