BISI HAK… Awang Tengah nyua surat pala tanah ngagai siku ari penerima seraya Asfia (dua kiba), Henry (kanan) sereta bala temuai dipebasa bukai ngemata. GAMBAR RAMIDI SUBARI

BAU: Pengawa nyukat tanah Hak Adat Bansa Asal (NCR) enggau lot individu ngambi meri pala tanah enda diketu seagi bisi nerima peminta ari pengempu tanah, ku Sapit Premier Sarawak, Datuk Amar Awang Tengah Ali Hasan.

Nya alai ku iya, pengawa nyukat semina deka dipejalai pengudah nerima peminta, dipesetuju enggau disukung orang ti madah tanah nya enggi sida.

“Peminta ti dianjung deka diperesa belalauka undang-undang enggau bukti nyata sebedau dikemendar ngambi disukat.

“Enti sida enggai ke tanah diri disukat kelingi, kereja nyukat enda dipejalai,” ku iya lebuh bejadika Pengawa Nyua Gazet Rizab Komunal Bumiputera Seksyen 6 Kanun Tanah Negeri enggau Surat Pala Tanah Seksyen 18 Kanun Tanah Negeri (Betanam Betupi enggau Menua Asal) Sitak DUN Tasik Biru di Dewan Sri Singai, ditu tadi.

Ngenang silik agi, Awang Tengah ti mega Menteri Pengeraja Asal enggau Pemansang Mengeri II madah ke pengawa nyukat tanah NCR bepun enggau renggat keterubah ngambi mayuh agi tanah NCR ulih disukat enggau jampat nentuka tanah bisi entara ti nyengala enggau direjister dalam rejister tanah.

Udah nya ku iya, Gazet Rizab Komunal Bumiputera ngena seksyen 6 KTN diberi lalu udah nya, pengawa nyukat lot individu ulih dipejalai ngambi diberi surat pala tanah ngena seksyen 18 KTN.

“Program tu benung chakah dipejalai mungkur semua sitak enggau bagi menua di selampur Sarawak nyerangkung semua raban bansa Bumiputera ti bisi hak ba tanah NCR.

“Asal mih bisi bukti nyata, amat enggau nitih undang-undang ti madah ke nya tanah NCR sida,” ku iya.

Taja pia, Awang Tengah madah ke sebarang tanah ti agi dipetalat enggau dipechara di kort, dia pengawa nyukat enda dipejalai kelimpah kes nya dibatak, enggau orang ti minta patut minta baru nyukat tanah NCR sida.

Iya madah, nengah program nyukat tanah NCR, JTS udah mujur nyukat kelingi pemesai urung 1,168,123 hektar (2.8 juta ikar) semua bagi menua Sarawak ari taun 2010 ngagai 31 Oktober 2024 enggau ari penyampau nya, urung 924,596 hektar tauka 2.28 juta ikar udah digazet.

Naka 31 Oktober 2024, Awang Tengah madah bisi 93,222 lot individu udah disukat ngaul kandang menua pemesai 112,021 hektar (276,804 ikar).