Sarawak udah bejalaika 121 SPS enggau 198 SPK kenyau ari RMK4

Ding begambar enggau penerima TOL Ungkup Lot Palan Pengentap Pendiau Skim Ngemesaika Genturung Pendiau Kampung Selemas enggau SKim Ngemesaika Genturung Pendiau Kampung Bundong Sarikei.

BINTANGOR: Kenyau ari Atur Pemansang Malaysia Lumpar Ke-4 (RMK4), perintah Sarawak udah bejalaika sepenyampau 121 Skim Berumah Baru (SPS) ti udah nyendiaka sepenyampau 26,263 lot palan pengentap pendiau lalu 198 Skim Ngemesaika Genturung Pendiau (SPK) enggau lot palan pengentap pendiau bisi 22,958 lot.

KAban Kunsil Nengeri (ADUN) MEradong Datuk DIng Kuong Hiing madah, nengah kededua skim tu, perintah Sarawak udah mega nyendiaka sepenyampau 49,221 lot palan pengentap pendiau nenga skim ti udah dipejalaika di selampur Sarawak kelebih agi di kandang menua pesisir.

"Skim Ngemesaika Genturung Pendiau enggau Skim Berumah Baru nyendiaka lot palan pengentap pendiau ti lantang, berurun sereta disikap enggau mayuh macham perengkaguna pemun baka jalai alun, sistem parit, bekal ai enggau elekterik.

"Perintah Sarawak mega udah mantaika polisi baru iya nya ngemanahka spesifikasyen enggau komponen infrastruktur pemun d skim ke baru ti deka dipejalaika.

"Projek berurun agi enggau ngena chara baru baka ngemanhka infrastruktur pemun baka jalai alun ke suba nya jalai batu diatu diangkatmanah nyadi jalai belakin," ku Ding.

Iya madah munyi tu ba Pengerami Nyuaka TOL Ungkup Lot Palan Pengentap Pendiau Skim Ngemesaika Genturung Pendiau Selemas enggau Skim Ngemesaika Genturung Pendiau Kampung Bundong Sarikei, kena Hari Tiga nyin tadi.

Program tu diatur ba Dewan Opis Lama Meradong.

Nitih ku Ding agi, ketuai enggau perintah Sarawak, seruran bebendar memaksimumka pemansang di kandang menua ulu enggau menua pesisir ungkup pemaik nengeri, ungkup perengkaguna sereta pengelantang rayat.

Ku iya, tu ulih dipeda nyadi projek pemansang infrastruktur ke udah dikemendar lalu benung dipejalaika perintah baka pengawa ngangkatmanah jalai tebing pantai, Implementasi Projek Jalai Besai Kedua (Second Trunk Road), pengawa ngaga jematan ke udah digaga tauka benung digaga, Skim Ngemesaika Genturung Pendiau (SPK) enggau Skim Berumah Baru (SPS) sereta ke bukai.

"Diatu lot ke suba nya diagihka ti enda ditumbak tauka ditimbuk deka ditumbak lalu sistem parit dalam skim ke suba nya semina parit tanah deka dikemanahka enggau parit semin.

"Semua ungkus nimbuk, jalai belakin, parit semindeka dipelanja perintah Sarawak enggau ungkus urung RM100,000 siti lot.

"Siti agi inisiatif baru perintah dalam SPS enggau SPK iya nya ngurangka tikas premium enggau 50 peratus ungkup lot palan pengentap pendiau di semua SPS enggau SPK iya nya enda ngelui RM2,500 siti lot," ku Ding.

Iya mega nambah, inisiatif tu dipejalaika dikena ngelempungka tating penusah rayat ti penatai pemisi baruh ti bisi dalam skim tu dikena mutarka pengawa mnayar premium.

Ku Ding madah, SPK Kampung Selemas enggau Kampung Bundong tu nyendiaka bisi 176 lot palan pengentap pendiau lalu ari penyampau tu, perintah udah ngemendarka 148 lot ti sebagi ari belanja nya udah dikemendarka, lalu penyampau TOL ti deka disuaka iya nya bisi 47 lot.

Sama bisi datai dalam pengerami tu iya nya Penguasa Tanah enggau Survei Bagi Menua Sarikei Thian Choon Kui, pengari Residen Bagi Menua Sarikei Susie Dominic enggau Ketuai Polis Pelilih Menua Meradong DSP Sekam Anoi.