Font Size Font: IncreaseFont: NormalFont: Decrease
The Official Website of
Land and Survey Department, Sarawak Malaysia


Pengawa nyadi tukang sukat tanah semampai tebuka
Posted on : 12 Oct 2020  Source of News: Suara Sarawak
 

KUCHING: Peluang gawa nyadi tukang sukat tanah endang seruran tebuka ba Sarawak kelebih agi dalam pengawa ngatur tanah enggau survei.

Sapit Sekretari Perintah Sarawak Datuk Dr Sabariah Putit madahka rebak baru diatu patut dilatih enggau pengabis manah awakka ulih nyadi siku tukang sukat ti bepenemu di menua tu.

“Aku pechaya sida mesti dilatih. Nyeridi rebak baru nyadi siku tukang sukat endang patut laban pengawa tu siti pengawa ti amat beguna.

“Tu kelebih agi lebuh kitai meda guna teknologi digital dalam bidang tanah enggau survei seriris enggau juluk ati perintah nuju ekonomi digital,” ku iya.

Iya bejaku munyi nya maya nutup pengerami Minggu Inovasyen Pengereja Perintah Nengeri Sarawak di sebuah hotel tebilang ditu, kemari.

Kenu ku Sabariah, enggau guna teknologi dalam pengawa jurusukat, rebak baru deka ulih besemekih ngena teknologi baru lalu ngambi peluang nya nyadi peneleba sida lebuh gawa.

“Iya ukai semina mai kitai nuju industri 4.0 tang mega deka nyadika Sarawak ngembuan lebih mayuh tukang sukat ti bepenemu ba maya ti deka datai,” ku iya.

Ba program kemari, nembiak kus Diploma Geomatik ari Politeknik Kuching bisi dikangau nyereta ninga licha Profesion Jurusukat: Inovasyen enggau Transformasyen ti diatur JTS.

Sama bisi datai Direktor JTS Abdullah Julaihi, Direktor Mampu Sarawak Banges Munga, Direktor Politeknik Kuching Jamilah Ahmad, Pengelicha ari Universiti Teknologi Malaysia Prof Madya Dr Tajul Ariffin Musa enggau bala bukai.